Poslovne vesti - Makedonija

Мали пристаништа ќе ја подигаат атрактивноста на туристичките места

Мали пристаништа ќе се монтираат на езерата во државата со цел дополнително да се промовираат туристички атрактивните места и да се подобрат условите за внатрешната пловидба.

Врз основа на анализа што ја направи Министерството за транспорт и врски Владата вчера усвои акционен план со кој е предвидена можноста за поставување на пристаништата.

Предвидено е да се постават вкупно 10 мали пристаништа на локации во Охридското, Преспанското, Дојранското и Мавровското Езеро. На Охридското Езеро треба да се монтираат мали пристаништа на пет локации, од кои четири во општина Охрид, на плажите Љубаништа, Магнус, Куба либре и Немо. Бидејќи овие плажи ќе се издаваат под краткотраен закуп, поставувањето на мали пристаништа ќе биде една од обврските за идните закупци, а огласите за закупување на плажите уште овој месец ќе ги распише Министерството за транспорт и врски. Едно мало пристаниште предвидено е и на градската плажа во Струга, а бидејќи општината ги има преземено надлежностите во делот на управување со градежното земјиште, неговата изградба ќе му биде препорачана на градоначалникот.

На Преспанското и на Дојранското Езеро треба да се постават по две пристаништа. Тендерот за нив ќе го распишат Министерството за транспорт и врски и а.д. ЕЛЕМ. На Мавровско Езеро ќе има само едно пристаниште и за него ќе биде задолжено ЈП Национален парк Маврово".

Станува збор за стандардни мали пристаништа, популарно познати како понтони, кои често се подигаат во земјите каде што има развиена пловидба на езерата и реките. Тие се многу стабилни и издржуваат удари на бранови до еден метар, како и висинско поместување на водата со оглед на начинот на сидрење до 9 метри длабочина. Тие се поставуваат на половина метар над водата, имаат просечна должина од 10 до 12.5 метри и широчина од 2.4 до 4 метри. Пристаништата можат да бидат осветлени и опремени со мост за приод, гумени одбојници и скала за качување од вода, а можно е на нив да се постави и пумпа за точење гориво.